(فى أمَ ولادها بيكرهوها قوى كده؟؟!!!!
طب نجيبلها ولاد منين لو انتوا هاتمشوا و تسيبوها؟؟!!
و لو سافرتوا و سيبتوها نسيبها للبوم و الغربان؟؟!!!).............

نقلا عن ا.د/ محسن زهران "غنى عن التعريف"

مصر مش هاتتقدم من غير ولادها .....لكن ولادها مش لاقيين ياكلوا....................
أدى ذلك الى الأنانيه و زيادة التفكير المادى

بس فى حاجه مهمه ان الناس كلها مش عايزه تتحرك و كلهم بيدوروا على الأسهل مش على الأحسن و مستنيين كل حاجه أو أى حاجه على الجاهز
لازم نتحرك و نشتغل بجد من غيييييير أى شماعات
المساحه اللى احنا قاعدين فيها ضيقه .... و بلدنا كبيره ما شاء الله
ليه بقى مصرين نقعد فى نفس الحته؟!!!

فرص العمل مش كتيرة بجد كل الناس حاسَين بالموضوع ده و ده صحيح
بس احنا نسينا حاجه مهمه قوى
نسينا عزيمتنا (توفيق ربنا فوق كل حاجه)


الممر ببساطه هيوسع المساحه اللى احنا قاعدين فيها تجاه الغرب
علشان يتعمل إما احنا اللى نعمله أو نستورد ناس تانيه هيعملوه أسرع و أغلى بكده يبقى معملناش حاجه
هيطلع 12 ممر عرضى من المدن المهمه و المزدحمه و يتلاقوا مع الممر الرأسى
تخطيط الموضوع لازم يكون صح قوى علشان تكون النتائج زى ما احنا متوقعين و أحسن
محتاجينكوا كلكم ... مش بنحلم حلم مستحيل و الله

المتسربين من الوطن

المتسربين كلمة طالما سمعتها و أنا أصغر نسبيا ... لم ألتفت لها كثيرا شأني شأن ناس كتيير قوى ... المتسربين من التعليم - المتسربين من الخدمة العسكرية - الأطباء المتسربين ... إلخ
لمن لم يسمع بهذا المصطلح من قبل - دي صفة بتطلق على الإشخاص اللي بيخرجوا عشوائيا عن النظام الإجباري أو النظام المتعارف عليه ... يعني لو شاب تخرج ولم يتقدم لتحديد موقفه من الخدمة العسكرية - أو لو ولد أو بنت ترك المدرسة قبل إنهاء التعليم الأساسى - أو لو طبيب لم يتقدم لأداء فترة التكليف بتاعته ... دول بيسموهم متسربين

دائما كانت عندي قناعة إن وجود متسربين معناه وجود قصور فالنظام - القصور ده هوه اللي بيدفع عناصر النظام للتسرب ... وكل ما يزيد القصور كل ما تزيد نسبة التسرب !

مؤخرا لاحظت زيادة أعداد المتسربين من "الوطن" ... عدد الناس اللي بتسافر و تسيب البلد سواء سعيا وراء الرزق أو العلم بيزيد كل سنة عن السنة اللي قبلها ...
طيب - لو طبقت نفس القاعدة / القناعة اللى عندي على الموضوع ده حتكون النتيجة إنه فيه قصور في النظام العام "للوطن" - قصور بيدفع أبناء الوطن ده إنهم يخرجوا عن النظام الطبيعي بإنهم يسيبوا البلد اللي إتولدوا وإتربوا و إتعلموا فيها ويروحوا أماكن تانيه ... ولو إفترضنا إن أهم سببين للسفر هم السعى وراء الرزق أو العلم يبقى القصور بيزيد كل سنة في الحتتين دول بالذات.

النهاردة على مصراوي خبر لطيف (جنبه صورة لأحمد نظيف) بيقول 6.32 مليار دولار تحويلات المصريين العاملين بالخارج عن العام الماضي 2006/2007 مقابل 2.84 مليار دولارسنة 2001 بزيادة قدرها 222% في 5 أو 6 سنين ...

ده رقم لا أعتبره مؤشر حقيقي للتسرب لإن ممكن ده يكون بسبب زيادة الأجور في الخارج (متوسط زيادة الأجور في الخليج السنة اللي فاتت 11.4%) أو تغيير في شرائح العمالة المصرية في الخارج كأن تزيد أعداد حملة المؤهلات العليا على حساب أعداد غير المتعلمين وحملة المؤهلات المتوسطة مما يعنى زيادة الرقم الإجمالى دون زيادة عدد العمالة بنفس النسبة ...

يعني فيما يتعلق بالمتسربين مش ده الرقم اللي يخض !

الرقم اللى يخض فعلا هو إن 44 % من المليون مصري اللى حصلوا على تصاريح عمل رسمية في الخارج السنة اللى فاتت حصلوا عليها لأول مرة ... يعنى ما يقرب من نصف الرقم ده سافروا / تسربوا السنة اللي فاتت بس !!

أظن دي مصيبة بكل المقاييس ... مصيبة بتؤكد فشل النظام في تأمين فرص عمل "حقيقية" للشباب ...

متوسط الزيادة السكانية في مصر في السنوات الأخيرة 1.3 % سنويا - يعني إحنا بنزيد حوالى مليون نسمة سنويا ... طبقا لهرم السكان في مصر فتقريبا نصف الرقم ده من الذكور والنصف الآخر من الإناث ... يعني مصر سابها السنة اللي فاتت قد الذكور اللي إتولدوا فيها تقريبا ... طيب ما أغلب المسافرين للعمل بالخارج من الذكور وده لأسباب تتعلق بالتركيبة الإجتماعية للمجتمع المصرى ولحاجة المجتمعات اللي بنفضل كمصرين السفر للعمل بها (95 % من اللي سافروا سافروا لدول عربية أغلبهم في الخليج)

خلاصة القول - لو إستمرينا كده ثلاث أربع سنين كمان حنروح في داهية مش بس عشان إحنا بنفقد سنويا كل أعداد الذكور المفترض إنهم بيضافوا لقوة العمل - لأ دي المشكلة أكبر بكتير من كده لإن نظريا اللي بيسافروا دول أغلبهم من المؤهلين/الكويسين اللي ملقوش فرصة حقيقية هنا وفي نفس الوقت لقوا حد هناك يقدر إنهم كويسين ... كمان كام سنة مش حيكون فاضل حد "كويس" يشتغل في مصر ..

بصورة مبسطة لو قولنا إن مصر بيُضخ فيها كل سنة 100 شاب متنوعين ما بين الممتاز و المتوسط و المتواضع فمصر بتفقد كل سنة 100 زيهم أغلبهم من الممتازين ... يعني كلها كام سنة والبلد حتنهار داخليا بسبب غياب "الكويسين" و بعد ما كنا بنتفاخر بالقوة العاملة المصرية و أعداد الشباب و إن مصر ولادة مش حيفضل في مصر الولادة غير المكسحين !! (إلا من رحم ربي)

أي حد يقعد مع أي صاحب شركة أو مصنع كبير كان أو صغير حيلاقيه بيشتكي نفس الشكوى المكررة "فيه كتير بس مفيش حد كويس" ...

طب حد عارف إن مؤخرا فيه مصانع في مصر أصبحت بتجيب أطقم عمالة كاملة من الخارج ... من بنجلاديش و الفلبين و الهند لنفس السبب !

فين بقى وزيرة القوى العاملة من الكلام ده ... وهل فيه سياسة موضوعة أو بيتم وضعها للسيطرة على أعداد المتسربين ... أظن دى ضرورة إستراتيجية أهم من هجس كتيير بتقوم به الحكومة يوميا !!

http://geddoiskandar.blogspot.com/2008/10/blog-post_20.html

السلام عليكم
أولاأرحب بيك يا بشمهندس وأحييك على المجهود الجامد جدا
بس هل عندنا إحنا بس الحل؟
(إحنا دول الناس إللى ممكن تكون حاسة باللى حاصل فى البلد وممكن نحاول على أد ما نقدر نعمل اى حاجه والله عشان نعرف بس نعيش كويسين )
وهل هناك من عنده الحل غير الحكومه اللى هاتجبنا للوراء دى ؟؟؟؟؟
انا شايف إن المفروض يكون فى حملات إعلانية كبيرة بتحس الناس على الصح سواء كانت على النت (المنتديات _ الفيس بوك_او غيره وغيره _التلفزيون طبعا)

إحنا عندنا جزء كبير من الحل ...
فيه حاجة إسمها نشر الوعي ... إنك تتكلم في كل مكان - عرف الناس بالوضع و بالحلول المقترحة ... إشرك أكبر قدر ممكن من الناس معاك - أول وأهم خطوة في الإصلاح هي نشر الوعي

إكتب في منتدي، في بلوج، على الفيس بوك، إتكلم وإنت عند الحلاق، إتكلم وانت في القطار أو المترو أو الترام، إتكلم في النادي، إتكلم في كافيه، إتكلم في الجامعة، إتكلم في الشغل، إتكلم في البيت مع أهلك، إتكلم بعد الصلاة مع صحابك اللي في الشارع ...

أظن مشكلتنا في مصر إن اللى عارفين مش كتير ... لا يكفوا للقيام بأي عمل إيجابي سواء كان العمل ده نهضة أو حتى ثورة ... إذا وظيفتنا حاليا نشر الوعي بكل طريقة ممكنة

نسبة المتعاملين مع الكمبيوتر في مصر كأداه ثقافية ضعيفة جدا ... ونسبة المهتمين منهم بالقنوات الإعلامية "الكمبيوترية" لا تتعدي ال 5% من جملة عدد الناس الموجودين في مصر (ده حسب أكثر التقارير تفائلا)عشان كدة المنتديات والفيسبوك والبلوجز مش كفايه ... أكيد مهمه بس "مش كفاية" - المطلوب هو خروج الوعي اللي بنكتسبه من قراءاتنا اليومية إلى من لا يقرأ أصلا

ولا إيييييييه؟؟

اكيد طبعا كلام جميل وصح وربنا يقدرنا